Фото и рецепт: Верица Николиќ
Потребни состојки:
280 г брашно
100 г презла
160 г пченичен гриз
400 г шеќер
1 прашок за печиво
100 г лешник (ореви или бадеми)
½ кесичка цимет или по вкус
За фил:
2 кг киселкасти јаболка
За преливање на питата: 250 г маргарин или путер
Постапка:
Лешниците (оревите или бадемите) ставете ги во рерна малку да се испечат за да добијат посилна арома. Кога ќе изладат сомелете ги. Мерката за јаболка е дадена за неисчистени јаболка. Измијте ги добро, излупете ги, изрендајте ги на крупно ренде и поделете ги на два еднакви делови.
Во подлабок сад соединете брашно, презла, гриз, шеќер, прашок за печиво, мелени лешници и цимет. Оваа смеса поделете ја на три еднакви делови.
Плех со величина 35х20 см намастете го со маргарин (или путер) дното и ѕидовите, па рамномерно истурете една третина од смесата. Со лажица нежно израмнете. Одозгора распоредете половина од ваболката (не се цедат). Потоа истурете ја втората третина, па остатокот од јаболката и последната третина.
Маргаринот растопете го и со лажица прелијте го рамномерно врз питата.
Ставете да се пече во претходно загреана рерна на 160 степени. Кога површината ќе добие благо румена боја, питата прекријте ја со алуминиумска фолија и продолжете со печење.
Печената пита (пробајте со чепкалка дали е печена) извадете ја од рерна и оставете целосно да излади. Потоа сечете на коцки и послужете. Питата може по вкус да ја наросите со шеќер во прав.
Фото и рецепт: Верица Николиќ
