Фото и рецепт: Марина Станојевиќ

Овој ролат ако додека е свиткан во проѕирна фолија може да го чувате една седмица во фрижидер без да се расипе и да изгуби од својот вкус и квалитет. Секое утро може да си отсекувате по едно парче за да уживате заедно со кафето или чајот и така убаво да го започнете вашиот ден.

Потребни состојки за прв дел:

150 г шеќер
500 мл вода
500 г суви смокви
80 г мелени посни бисквити

Потребни состојки за втор дел:

100 г шеќер
300 мл вода
50 г маргарин
250 г мелени ореви
5 г цимет

Постапка за првиот дел:

Сомелете ги сувите смокви со машина за мелење месо. Во тенџере ставете вода и шеќер, па варете неколку минути додека да добиете сируп. Потоа тргнете од оган и додадете ги мелените смокви, промешајте, па потоа додадете ги и мелените бисквити.

Смесата распоредете ја на парче проѕирна фолија, па прекријте ја со друго парче. Потоа прво со прстите, а потоа со оклагија развлечете ја смесата во правоаголник.

Постапка за вториот дел:

Оревите сомелете ги или иситнете ги со сецко. Сварете ја водата со шеќерот, додадете коцкички маргарин, па кога ќе се растопи додадете ги оревите и малку цимет. Смесата развлечете ја на ист начин како и претходната.

Завршна постапка:

Тргнете ги готните фолии од двата дела, а онаа со оревите подигнете ја и префрлете ја преку делот со смоквите.

Поминете со оклагија за да се соединат двата слоја. Тргнете ја горната фолија (онаа врз слојот со оревите) и полека, но заедно и цврсто свиткајте ги во ролат.

Ставете го во фрижидер и кога доволно ќе излади сечете го на парчиња.

Совет: Фолиите наросете ги со шеќер во прав за полесно да се одвојуваат, а и самиот ролат можете исто така да го извалкате во шеќер во прав и така да го чувате.